港超聯　夠喇！23歲蔡國威掛靴

繼白榮澤因受傷患困擾而在25歲之齡掛靴轉行後，比「阿澤」更年輕的前香港U21中場球員蔡國威，亦因為聽家人和女朋友的意見，加上自覺際遇「每況愈下」，決定掛靴投考紀律部隊。「我的確好鐘意踢波，做職業球員亦係我自細嘅夢想，可惜近兩季季尾周圍問有冇球隊要、一味呆等嘅感覺實在唔好受，夠喇！我決定轉行，會先去考海關。24歲未夠就退役係好似早咗啲，但24歲退點都好過34歲先退啦，係唔係？」花名「B仔」的蔡國威表示。

17歲在大中踏上職業球員之路的「B仔」，先後効力過港菁、晨曦、愉園、太陽飛馬，以及和富大埔，初出道發展尚算不錯，惟前季轉投愉園開始，發展便大不如前。直至和富大埔本月初宣布無力接受足總挽留，決定降班落港甲，「B仔」再一次對際遇感到無助和失望，故立定決心掛靴，另覓發展。「球圈除咗講實力，都好講際遇，自問這方面似乎愈嚟愈弱，太被動喇！特別呢兩季尾搵班落同等班落嘅感覺，實在唔好受。喺呢方面，屋企人同女朋友『婷婷』都畀咗好多意見我，我都考慮得好清楚，既然我『毅進』都就畢業，索性的起心肝踢波去轉行。」蔡國威謂十分感激家人和「婷婷」，一直以來的支持。

除了家人和女友外，蔡國威亦把握機會向三位恩人道謝，他說：「第一個係將我由大埔青年軍帶去踢大中嘅教練『陳Sir』（即陳浩然），唔係佢我都未必可以喺17歲就踢到上甲組，多謝佢畀呢次機會我！第二個係晨曦教練『招Sir』（即招重文），佢都畀咗好多機會我，踢晨曦嘅日子係咁多年嚟最開心嘅，多謝晒！第三個就係前季喺愉園簽我去太陽飛馬嘅CowSir（即陳志康），當時佢就好似將跌咗落井嘅我救番上嚟一樣，亦畀我感受到咩叫職業足球。佢哋三個對我嘅恩，我永遠都唔會忘記。」蔡國威亦表示要多謝好友、正在養傷的南華球員陳文輝，他說：「佢喺我最無助嘅時候出手幫我，唔該晒佢。」

最後，蔡國威寄語有志投身職業足球，以及一眾現役年青球員，「有機會、有時間，真係要去進修，只有不斷自我增值，先唔使擔心個球市變成點。」

「B仔」，祝一路順風、前程錦繡。