東網電視
更多新聞短片
英超中游大戰愛華頓主場對西布朗，擁有主場之利嘅「拖肥糖」，全場壓住西布朗嚟踢，但多番攻門都未能入波。直到39分鐘，愛華頓「新魔獸」盧卡古左路地波傳入禁區，西布朗後衞解圍不遠，巴克里喺禁區頂第一時間敞射，西布朗門將賓科士打撲出不遠，被門前嘅米拿拉斯篤入，愛華頓半場領先1比0。踏入上半場補時，盧卡古又發動攻勢，中路擺脫西布朗後衞，直線傳入禁區，隊友舒尼達連接應並轉身射入，為愛華頓領先到2比0進入更衣室。
下半場繼續係愛華頓主導比賽，取得64%控球率，去到82分鐘，盧卡古終於有收穫，禁區內接應左路傳中波，喺對方守衞力壓下頂入，為愛華頓鎖定3比0勝局。
同時間舉行嘅護級大戰，賽前排19位嘅侯城，於主場以2比1擊敗排16位嘅史雲斯，全取3分後升上18位，與17位嘅水晶宮只差1分，季尾護級好睇過戲囉！
東網體育同你追實體壇每個精彩時刻！
