東網電視
更多新聞短片
一場勝仗都未必可幫雲格解除煩惱。(法新社圖片)
1/7
今晨上演嘅英格蘭足總盃8強賽事，阿仙奴面對近103年以來首支殺入8強嘅非聯賽球隊林肯城，結果憑住禾確特、基奧特、阿歷斯山齊士同艾朗藍斯各入一球，加上對手嘅烏龍波，喺主場以5比0大勝，殺入4強。
今場波焦點，除咗係睇林肯城個童話之旅仲有冇得繼續，當然仲想睇吓近排不斷畀球迷要求離隊嘅領隊雲格，點面對呢股強大壓力。果然今場波賽前又有球迷大搞趕走雲格嘅活動，包括拉晒橫額同嗌口號等。
雖然阿仙奴最後贏咗場波，但砌低支非聯賽球隊，想話令壓力減退似乎都係唔多實際，不過雲格賽後就趁勢同大家講，佢冇諗過走，話大家講嚟講去都係嗰幾句，根本唔係講緊真相，佢話佢只會係球場上作回應。呢位法國名帥話佢執教「兵工廠」生涯以來，一直都係忠於阿仙奴，全心全意為球會，佢話明佢仲想一直繼續為阿仙奴服務，至於留任幾耐，佢話冇諗過喎！即係話大家想佢走？慢慢等啦！
東網體育同你追實體壇每個精彩時刻！
阿仙奴球迷賽前遊行示威抗議雲格繼續領軍。(法新社圖片)
大勝一場，雲格一樣笑唔出。(法新社圖片)
球迷舉橫額要求雲格離開。(法新社圖片)
雲格真係要多謝基奧特有波入。(法新社圖片)
阿仙奴球迷對雲格非常不滿。(法新社圖片)
林肯城球員賽後未有洩氣，圍埋一切鼓舞士氣。(法新社圖片)
