東網電視
更多新聞短片
1/10
好心有好報呀！相隔3年，再次入選英格蘭國家隊嘅前鋒迪科爾，今晨力壓占美華迪取得正選上陣，即以入球回報主帥修夫基信任，率領「三獅兵團」喺世盃外歐洲區F組主場以2比0力克立陶宛，全取3分。呢位34歲射手今戰賽前夥同5歲癌症病童洛維利進場，接受球迷歡呼打氣，果然迪科爾呢份愛心最終得到回報，勁洋蔥囉！
英格蘭主場對立陶宛，主隊憑住迪科爾開賽22分鐘接應史達寧左路底線傳中，近門撞入領先。到67分鐘，以後備身份入替迪科爾嘅占美華迪，上陣僅只6分鐘就即刻錦上添花，埋單英軍贏2比0，喺F組以5戰得10分續居榜首。
場波戰果正路，不過賽前「三獅兵團」勁忙，既為上周三喺英國倫敦發生嘅恐襲事件默哀，亦臂纏黑紗為今年一月去世嘅前英格蘭國家隊領隊格拉咸泰萊作出悼念。至於隊長赫特亦將帶隊進場任務轉交迪科爾，事關後者近排正全力為病童洛維利打氣，二人背後故事超感人。
原來只得5歲嘅洛維利，身患非常罕見嘅癌症名為神經母細胞瘤，據聞今次已經係第2次復發，病情已經進入晚期，而喺賽後一日，洛維利將會接受新一輪治療。據知，迪科爾係早前一次去醫院探病活動，認識到呢位5歲小朋友，而上月洛維利亦曾以球僮身份同迪科爾喺新特蘭嘅比賽帶隊入場。今次洛維利帶隊入場一刻，喺溫布萊嘅掌聲雷動，就連洛維利小朋友都要用雙手掩住耳仔，不過得到全場球迷嘅祝福，除咗迪科爾好心有好報，希望洛維利嘅病況都可以有奇迹啦！
東網體育同你追實體壇每個精彩時刻！
迪科爾相當愛錫洛維利。
英格蘭領隊修夫基(左)亦與洛維利玩耍。(法新社圖片)
史達寧(左)嘅妙傳助迪科爾入波。(Getty Images)
未受大病影響，洛維利滿臉笑容。
賽前為倫敦恐襲事件致哀。(法新社圖片)
赫特(左)今場難得受到威脅。(法新社圖片)
隊長赫特(左上)讓迪科爾與洛維利率先進場。(Getty Images)
迪科爾(左)近射得手，回歸首戰即入波。(法新社圖片)
占美華迪後備登場都有「士哥」。(Getty Images)
