東網電視
更多新聞短片
(Getty Images)
1/10
【01:54】【全場完】曼聯 2:1 愛華頓
曼聯最終憑保羅普巴上半場射失12碼但及時補射建功，以及下半場安東尼馬迪爾嘅「香蕉球」，以2比1險勝有基菲爾施古臣12碼破蛋嘅愛華頓。
今場曼聯表現其實唔錯，踢進攻足球甚具壓逼力，同愛華頓鬥攻夠晒娛樂性，攻勢由保羅普巴、安東尼馬迪爾及費特洛迪古斯等攻擊手策動，發揮流暢。
不過球隊領先兩球下，再度出現個別球員唔集中嘅老問題，保羅普巴於中場不必要賣弄腳法，連累球隊被對方快攻而輸12碼，令球隊出現危機，末段安東尼馬迪爾因體力下降，單刀門前失機亦甚為可惜。
【01:35】贏緊兩粒嘅曼聯又玩嘢，保羅普巴中場玩波累事，李察利臣單刀殺入禁區，基斯史摩寧被迫以超技術踢跌對方輸12碼，基菲爾施古臣主射破網追成1比2。
【01:07】下半場開賽4分鐘，曼聯繼續攻勢，安東尼馬迪爾左路起右腳彎遠柱網仔入，曼聯贏到2比0。
【00:45】【半場完】曼聯 1:0 愛華頓
曼聯上半場踢法主動，保羅普巴安排做攻擊手表現稱職，多次發動攻勢，主射12碼宴客幸好及時補中，安東尼馬迪爾盤扭殺入對方腹地亦具威脅，不過愛華頓攻勢亦銳利，全靠門將迪基亞有水準發揮，鎮守紅魔大門，令球隊暫時領先。
【00:37】基菲爾施古臣頭槌衝頂，勁度十足，好彩又畀迪基亞企穩接實。
【00:30】曼聯另一攻勢，保羅普巴左路抽射，比克福特又救到，拉舒福特門前補射入網，可惜越位在先食詐胡。
【00:27】曼聯繼續搶攻，安東尼馬迪爾博得12碼，保羅普巴主射遭比克福特撲到，好彩個波落番佢腳下，及時補射入網，曼聯領先1比0。
【00:23】曼聯繼續搶攻，安東尼馬迪爾左路推順大腳抽射，比克福特拍出底線，紅魔鬼今場踢進攻足球喎。
【00:19】曼聯回敬一個頭槌，桑馬達門前得機勁頂攻門，比克福特接實。
【00:14】愛華頓角球攻勢，安達高美斯頭槌勁頂攻門，好彩迪基亞冇瞌眼瞓，接實。
[23:34]
今日英超尾場有曼聯大戰愛華頓，近排演出備受批評嘅曼聯前鋒盧卡古，今場終於冇咗正選，改由拉舒福特擔正掛帥，估佢唔到喎！
曼聯正選陣容（433）
門將：1迪基亞
後衞：18艾舒利楊格、12基斯史摩寧、2域陀連迪路夫、23勞基梳爾
中場：17費特洛迪古斯、31尼曼查馬迪、6保羅普巴
前鋒：8桑馬達、10拉舒福特、11安東尼馬迪爾
愛華頓正選陣容（4231）
門將：1比克福特
後衞：23史密斯高文、4米克堅尼、5葛特蘇馬、12盧卡斯迪治尼
防中：8安祖高美斯、17伊祖沙古爾
攻中：11禾確特、10基菲爾施古臣、20班納特安尼斯奧
前鋒：30李察利臣
[23:25]
英超早場齊齊打完，車路士憑住艾華路莫拉達、巴克里、韋利安同羅夫度斯卓克各建一功，輕鬆以4比0作客大勝般尼，以10戰7勝3和得24分升上第2位，只係落後「一哥」利物浦2分。
至於同時段阿仙奴作客水晶宮喺先失一球之下，雖然一度憑住格列沙加同奧巴美揚連入兩球反超前，可惜最終末段再輸今場第2個12碼，慘被水晶宮逼和2比2，喺各項賽事11連勝終於斷纜。
[23:20]
補時階段，基奧特接應傳中頭槌攻門，點知畀般尼門將撲到再中楣，「銀河唯一」今季仲未開齋。轉頭羅夫度斯卓克喺角球混戰近門射入，車仔贏到4比0。
[23:11]
水晶宮又有12碼，米利禾積域操刀一針見血，追和阿仙奴2比2喇！
[23:02]
般車戰，車仔以基奧特入替艾華路莫拉達，後者有黃牌喺身，費事惹麻煩喇！同時間，般尼中場積克確克傷出，由艾殊利韋斯活特入替，超黑仔喎！
[22:50]
般車戰62分鐘，車仔快翼韋利安前場左路禁區邊又一個冷箭搞掂，車仔贏到3比0。
[22:44]
水阿戰56分鐘，阿仙奴靠角球攻勢，由奧巴美揚接應近門得手，反超前2比1。
[22:44]
般車戰，56分鐘，巴克里禁區外冷箭射死角入網，車仔拉開到2比0。
[22:40]
水阿戰，下半場7分鐘，格列沙加接應角球建功，阿仙奴追番1比1喇！
[22:23]
半場完，車仔靠敗家仔艾華路莫拉達打破僵局，作客暫以1:0領先般尼，相信會睇定嚟食。相反，其倫敦死敵阿仙奴因梅斯達菲犯錯，喺完半場前輸12碼，作客暫以0比1落後畀水晶宮，能夠保住連勝強勢，就要睇主帥艾美利下半場點樣神級調動。
[22:18]水晶宮 1:0 阿仙奴
梅斯達菲又再犯錯，於禁區侵犯水晶宮球員，球證直指12碼，米利禾積域操刀先開紀錄。
[22:12]
水晶宮前鋒佐敦阿休殺入禁區，被阿仙奴後衞梅斯達菲輕輕撞跌，球證未有吹罰12碼。
[22:00]
車仔前鋒柏度洛迪古斯因傷退下火線，由羅夫度斯卓克入替。
[21:52]般尼 0:1 車路士
車仔中場巴克里妙傳艾華路莫拉達快射破網，領先1粒。而今場雙方球員，以及另一場水晶宮對阿仙奴嘅球員，均有為李城墮機事件臂前頭紗致哀。
[21:42]
車仔右閘艾斯派古達落底線，韋利安回後畀巴克里遠射，僅僅畀般尼門神赫特撲出。
[21:30]
倫敦雙雄分途出擊，車路士作客般尼，以及阿仙奴作客水晶宮，正式開波。英超水晶宮對阿仙奴的賽事，雙方球員臂纏黑紗，亦於球場大螢光幕向李斯特城墮機事件致哀。
[20:45]
英超今晚大戰連場，其中早場時段，倫敦雙雄分途出擊，車路士作客般尼，以及阿仙奴作客水晶宮都出晒正選陣。其中車仔仲係用艾華路莫拉達打正前鋒，有冇貨交呢？「兵工廠」拿卡錫迪同奧巴美揚都一齊擔正，係咪12連勝都有機呀？
般尼正選陣容（4411）
門將：20赫特
後衞：2馬菲路頓、5達高斯基、6賓美、3查理泰萊
中場：7貝治古蒙臣、4積克確克、16迪科亞、12羅比巴迪
攻中：13軒迪克
前鋒：9禾基斯
車路士正選陣容（433）
門將：1阿列沙巴拿加
後衞：28艾斯派古達、30大衞雷斯、2魯迪格、3馬高斯阿朗素
中場：7尼高路簡迪、5佐真奴費路、8巴克里
前鋒：11柏度洛迪古斯、29艾華路莫拉達、22韋利安
水晶宮正選陣容（433）
門將：13軒尼斯
後衞：29雲比沙卡、5湯堅斯、12馬馬度沙高、3雲安荷特
中場：18麥亞瑟、4米利禾積域、8高耶迪
前鋒：10安祖斯唐辛、14佐敦阿休、11韋費特沙夏
阿仙奴正選陣容（4231）
門將：19賓特尼奴
後衞：2比利連、16洛賀丁、20梅斯達菲、34格列沙加
中場：11盧卡斯托拉拿、29古安杜斯
攻中：17伊禾比、10奧斯爾、14奧巴美揚
前鋒：9拿卡錫迪
(Getty Images)
(Getty Images)
(Getty Images)
(Getty Images)
(Getty Images)
(Getty Images)
(Getty Images)
泰國野豬男孩現身奧脫福球場睇曼聯對愛華頓(互聯網)
