東網電視
更多新聞短片
皇家馬德里今季立立亂，教練蘇拿利亦準備開始重建球隊，表現令人失望嘅加里夫巴利以及步入黃昏期嘅莫迪歷，就被視為重點「換班」項目。英國《太陽報》爆料，皇家馬德里已經制定一項9,000萬英鎊嘅計劃強攻英超，目標直指曼聯前鋒拉舒福特同埋熱刺中場基斯甸艾歷臣。
皇馬賣走C朗拿度之後，原本諗住加里夫巴利可以擔大旗，點知呢位威爾斯球星愈踢愈沉，據報皇馬主帥蘇拿利一向係拉舒福特Fans，日前更派球探去睇英格蘭反勝克羅地亞嘅歐國聯大戰，對「福仔」能力非常有信心，打算出5,000萬鎊收購呢位英格蘭超新星。
另外，皇馬中場莫迪歷已經33歲，呢位克羅地亞大師級中場嘅派牌同控制球賽能力已經爐火純青，睇番現今球壇，丹麥中場基斯甸艾歷臣係少數比較接近莫迪歷嘅球員，由於佢同熱刺合約只剩1年半，而且續約談判又冇乜進展，皇馬有望從中作梗，4,000萬鎊簽入呢位中場猛將。
東網體育FB同你追實體壇每個精彩時刻！
支持本地運動員，一齊去「睇體」！
