港超聯　凱景本年主場壓軸　熱血守和元朗

「中銀人壽香港超級聯賽」周日（9日）上演獨腳戲，凱景主場深水埗運動場力鬥佳聯元朗。兩軍苦戰下互無紀錄，凱景終在這場主場壓軸戰取得升班後的第1分。

是日天氣寒冷，但兩軍未受太大影響，作客來訪的佳聯元朗更開賽初段反客為主。4分鐘先得左路角球機會，惟前柱法比奧跳頂未能一擊即中。兩分鐘後基爾頓的中路罰球被杜瑋鴻解圍，而陳曉鋒之後接應法比奧傳送門前施射，亦未能打開紀錄。一直受壓的凱景，慢慢站穩陣腳後製造不少機會，惜徐相民12分鐘中路推順遠射僅告柱邊出界。「橙衫軍」隨後繼續控制比賽節奏，25分鐘更出現黃金機會，基爾頓於禁區混戰中起腳，惜被金東進護空門。法比奧33分鐘接應基爾頓左路罰球，右路窄位起腳只中網側。補時階段法比奧再找到機會怒抽亦僅僅中柱，雙方半場踢成0比0。

易邊後兩軍表現更進取，徐相民下半場初段5分鐘內兩度突破元朗防線，惜接應的孫銘謙和播磨浩謙均未能把球送入網。佳聯元朗戰至68分鐘有葉子俊一射破網，惜越位在先入球無效。73分鐘凱景門前出現大混戰，陳廣豪於遠柱把握對方解圍不遠狂抽被保羅拍出。1分鐘後葉子俊的右路角球直射亦未能攻破凱景大門，隊友基爾頓尾段的右路窄位半傳半射同樣被沒收。兩軍最終苦戰下握手言和，而凱景在483名球迷見證下，取得升上港超聯以來的第1分！

賽後凱景主教練馮凱文認為取得分數在於：「大家拼勁喇，其實我哋都不停練防守，我同佢哋講唔好諗點入波先，淨係諗點樣唔失波先，今場做到喇！當然，今場攞1分都有啲運。其實依家我哋有信心危機，攞到1分，打破咗缺口希望可以保持住。」他續指：「我哋陣式、踢法都有微調，將金珍曙推前一格，佢幫我喺中場掃蕩，效果都理想。」

據「馮Sir」透露，球隊將會於冬天轉會窗，簽下一名新外援前鋒，而金東進則因合約完結離隊。

而佳聯元朗主教練郭嘉諾稱：「我衷心恭喜凱景攞到呢1分，青年球員要證明自己唔係陪跑，今場佢哋做防守做得好好，希望呢1分可以鼓勵到佢哋，繼續喺聯賽證明自己。」他同時表示會陸續讓年輕球員上陣以增強後備力量：「我哋板凳深度比較淺，法比奧其實愈嚟愈攰，因為每場波都要佢踢足。所以我希望籍著每個出場機會，可以提攜多啲年輕球員，好似今場後備上陣嘅李藹軒咁，令到佢哋嚟到元朗唔好覺得係陪練，都有得踢。」

問及球隊會否趁冬季轉會窗增兵，「郭Sir」坦言球隊會有亞援中堅球員在冬天轉會窗加盟，亦會與高層商討於前線增兵，以提供更多進攻板斧。