【港超專版】細佬與樂仔穿越3年再拍住上

對於香港的一般「打工仔」而言，或許長駐內地工作，並非短期內能夠適應的事情。然而，對於香港的職業足球員來說，長期處於集宿及鄰近於恒常集訓基地的生活，卻是最佳的工作環境。今夏轉投富力R&F的守衞「細佬」梁諾恆就認為，在相隔3年後再跟「死黨」陳俊樂當隊友，兩人於廣州集宿的生活，令他重拾他們8年前在英國學法的回憶。■圖/文：何彥霆

以廣州燕子崗體育場作為主場的富力R&F，通常安排於比賽翌日放假一天，讓職球員可選擇回港與家人見面，梁諾恆認為除了可以定期返港之外，在足球層面上，他目前身處的環境，跟數年前入讀英國足球學院所見的相差無幾︰「喺廣州同英國嘅生活十分類似，因為我哋都好集中，去到宿舍或者訓練基地，個距離係好近，所以我哋每日休息嘅時間會特別多，其實會有助自己更加專注喺比賽同訓練上面。有咗喺英國生活嘅3年經驗，我覺得係幫助到自己去適應呢度嘅生活節奏。希望可以幫助到自己，令今年可以成為自己職業生涯一個重要嘅轉捩點，同時令自己繼續去進步。」

廣州搵食主攻清淡食物

作為職業球員，專注力當然會受環境因素影響，不過「細佬」則在飲食方面較為着緊，但很快也經隊友介紹一間鄰近宿舍的中式東北菜餐廳，雖然餐單不乏辣味及油膩食品，不過他「主攻」的是羊肉及餃子等較清淡食物︰「呢邊嘅食物會比較油膩，所以自己都會好小心選擇去邊間餐廳，避免自己好似上季咁出現腸胃炎，仲有要注意嘅，就係呢邊啲食物分量係比較多，所以要小心唔好叫太多嘢食！」

鼓勵「樂仔」入足球隊

月初於主場對佳聯元朗一仗，先後在不同年份入讀英國布魯克豪斯足球學院的「細佬」與「樂仔」（陳俊樂）分別與羅振庭、郭子堦等「校友」對壘，4人不忘於賽後合照留念，但原來第一個讓「樂仔」踏上足球場的人，就是小學年代的「細佬」︰「其實一開始識『樂仔』係喺小學，當時佢唔係十分願意加入足球隊，加入咗田徑隊，而我同小學足球隊嘅教練覺得佢好有潛質，結果膽粗粗去問『樂仔』同佢媽咪，會唔會有興趣加入足球隊？其實佢都扭扭擰擰咗一排，先至答應，而就由嗰一刻開始，我同佢成為隊友，由喺屯門區踢到英國，再返到香港嘅職業賽場，到依家去到國內嘅球會，其實好高興『樂仔』今年同中超嘅富力簽咗約。自己都好希望有一日，有機會去到國內嘅賽場同佢並肩作戰，或者未必做到隊友，就算只可以對壘的話，都會係一個難忘嘅經歷。當然目前首要條件，自己都要喺球隊踢出更好嘅表現。」

梁諾恆Profile

出生日期：1994年11月14日

身高：1.86米

體重：78公斤

位置：中堅

曾效力球隊：橫濱FC（香港）、YFC澳滌、香港飛馬、南華

現效力球隊：富力R&F

球衣號碼：24