東網電視
更多新聞短片
今季意甲神射手一定係屬於C朗？如果你咁諗，只可以講句：「少年，你太年輕喇。」周日(20日)晚意甲，阿特蘭大狂勝費辛隆尼5:0，杜雲沙柏達轟入4球，成為球隊近67年以來，首位食出大四喜嘅球隊，杜雲沙柏達亦同C朗、加利亞雷拉，以14球並列射手榜第1位。
27歲嘅杜雲沙柏達名氣當然比唔上C朗同加利亞雷拉，事關呢位哥倫比亞國腳大器晚成，過去10年先後效力阿美利加、學生隊、拿玻里、烏甸尼斯、森多利亞，但表現平平無奇。
直至今季加盟阿特蘭大，先至大爆發，上年12月對烏甸尼亞，上演帽子戲法，今場更加食出大四喜，要知道強如C朗，都仔未試過喺意甲戴帽或單場入4球。
上月阿特蘭大主場對祖雲達斯，身高1米89嘅杜雲沙柏達梅開二度，幫球隊打和祖記2:2，令C朗黯然失色，所以話C朗要奪得今季意甲神射手，真係要問過杜雲沙柏達。
難怪盛傳國際米蘭已經準備出手收購杜雲沙柏達，到時佢可以同效力AC米蘭嘅表哥沙柏達華倫西亞，合演「米蘭表兄弟打吡」。
支持本地運動員，一齊去「睇體」！
東網體育FB同你追實體壇每個精彩時刻！
Follow東網體育IG一齊撐本地運動員！
