港將杜國榆外流西乙B　同施多夫姪仔做隊友

恭喜恭喜！一月初協助香港隊衞冕省港盃嘅小將杜國榆，今日正式加盟西乙B球會胡米利亞，嚟緊會同前荷蘭名將施多夫嘅姪仔舒雲施多夫做隊友添！

喺北角長大嘅港、法混血兒杜國榆依家先得21歲，佢之前效力過傑志同飛馬青年軍，直到2015年赴美升學，並曾經出戰NCAA。司職中場嘅佢係舊年雅加達亞運嘅香港代表隊成員之一，而喺一月初嘅省港盃都曾經上陣，係衞冕功臣。

胡米利亞依家喺西乙B第4區嘅20支球隊入面排第9，呢班波近排積極增兵，其中一個星期前先向英超狼隊借用20歲嘅舒雲施多夫，杜國榆可以同佢兩個新人拍住上喎！