東網電視
更多新聞短片
(Getty Images)
力奇細個睇波聽桂神講波，12碼一係入，一係唔入，冇其他可能。不過依家我睇住曼聯喺比賽獲判12碼，除咗諗起入同唔入，就只係諗到快啲換劊子手。尋晚曼聯喺主場對住修咸頓，最終險勝3比2，場波去到補時階段，「福仔」拉舒福特搏到12碼，由常規劊子手保羅普巴操刀，結果佢又玩招牌婆仔碎步，再突然加速起腳，點知就畀對手門將隻腳擋出，錯過鎖定勝局機會，好彩之後「聖人」都冇入波，唔係無情情畀人追番失分，都咪話唔陰功。
睇番保羅普巴今季主射12碼紀錄，原來呢球已經係佢今季第3次射失，之前2次分別係英超第4輪作客般尼，普巴射失都贏2比0。仲有係第10輪主場鬥愛華頓，普巴又係同樣射法出事被救出，好彩場波都贏2比1。冇錯，呢位法國球星3次射失，球隊都冇失分，但幸福唔係必然，唔通真係等到佢宴客累失分先更換劊子手咩？
呢場波賽後，已經變咗講波佬嘅加利佬鬧爆普巴，話佢鍾意射12碼當做騷，玩嘢累全家。之但係家陣紅到爆嘅看守領隊蘇斯克查就話：「我即場叫咗佢準備下次再射呀！我冇諗住換劊子手，我以前都射失過，但佢係個充滿信心嘅孩子，佢想射咪射囉，我哋就係需要呢類球員。今次只係唔好彩，佢平時都入，所以我相信佢將來唔會有問題。」
其實以前連摩連奴都講過，欣賞普巴嗰份超強自信，所以先將劊子手資格交畀普巴。不過作為「紅魔迷」，力奇最關心都係成績，對於12碼最想係有保證，正所謂數據唔呃人，踢咗3分2球季，普巴已經射失3球12碼，係咪真係全隊都搵唔到個有信心又射得之人？「福仔」？盧卡古又點睇先？
支持本地運動員，一齊去「睇體」！
東網體育FB同你追實體壇每個精彩時刻！
