【港超專版】黎格爾：想入波喺精華見到自己！

闊別職業足球一季，22歲的黎格爾今季重返港超聯加盟佳聯元朗，與當年飛馬青年軍的教練郭嘉諾故劍重逢。「郭Sir」口中總是提着「犧牲」，現時為香港大學工程系四年級學生的「格爾」為了追逐足球夢，也犧牲了成績，然而他從未後悔：「因為我踢得開心，隊友又好，又有出場機會，雖然辛苦，但係值得。」

圖/文：陳焌鏗

2016/17球季，當時還在香港飛馬的「格爾」，雖然全季沒有上陣，仍獲時任港隊主教練金判坤徵召，前往緬甸和北韓出戰「緬甸KBZ銀行盃2017」、「亞洲足協23歲以下足球錦標賽外圍賽」。當日的感覺已讓「格爾」畢生難忘：「入選已經好難忘，因為嗰年冇出過場，多謝『Kim Sir』同『嘉諾Sir』揀我，仲要畀機會我踢正選。長遠目標一定係踢大港腳，依家嘅心願就係穩坐球會正選，唔想隊友有傷病先有機會正選。」

既年輕，又獲港隊主帥賞識，那麼「格爾」為何要離開職業足球呢？「嗰年唔踢波係因為冇乜機會上陣，加上兼顧踢波同學業好辛苦，所以想抖一年。咁啱嗰年港大搞咗隊波踢乙組，『達Sir』（理文教練曾昭達）都有幫手，就搵我幫校隊踢乙組。到今年隊波冇搞喇，『達Sir』就問我想唔想踢番超聯，之後就幫我搭路過咗元朗。其實自己都好想踢番超聯，始終畢業之後去向都未知，如果有機會踢波都想繼續踢。」「格爾」細說着。

司職中場、後衞的「格爾」今季最難忘一仗，是球隊主場逼和傑志：「因為係我第一次喺超聯踢正選，踢足90分鐘，臨尾仲要差啲入波，好彩最後隊友都補中，所以係一個好難忘嘅回憶。元朗氣氛真係好好，好多謝元朗球迷，好難得有一班人仲會入嚟睇波，仲要有球迷嗌到我個名，希望佢哋繼續支持。」「格爾」還期望：「自己踢嘅位置可能唔係太顯眼，有時睇精華都見唔到自己，所以我好想入波！呢排啲死球，我都有特登衝入去博混亂，希望完季之前有波入或有助攻！」

家人女友行動力撐

在香港，以足球作為職業未獲太多人看好，慶幸黎格爾在追夢的路途上獲得家人支持：「我嗰陣話唔踢，家人支持，因為想我專心讀書。到今年踢番，可能因為今年係大學生涯最後一年，家人都有啲擔心會影響我讀書，點知佢哋成日入場睇波，我諗屋企人都支持嘅！」

支持「格爾」的，還有其女友嘗真： 「多謝佢，每場都會嚟睇波，係好大嘅動力。有時會體諒我練完波攰，陪我休息。佢早過我畢業，已經出咗嚟社會做嘢，放工後仍會抽時間陪我、睇我踢波，你知啦，時間好寶貴架嘛，所以好多謝佢。」

【黎格爾Profile】

出生日期：1996年5月10日

身高：1米76

體重：65公斤

位置：中場、後衞

曾效力球隊：香港飛馬、天旭

現效力球隊：佳聯元朗

球衣號碼：24