堅Sir再膺「最佳教練」:我要超越更多

20190522
東網電視
更多新聞短片
(何彥霆攝)
「2018-19 香港足球明星選舉」頒獎典禮,周三(22日)晚假九龍灣宏天廣場百樂門宴會廳盛大舉行,由公眾投票開始票數一直被視為「大激鬥」的「最佳教練」,最後由和富大埔主教練李志堅奪得。
榮獲最佳教練殊榮的「堅Sir」指今屆能夠獲獎,全賴一眾球員的良好表現。繼2014至15年球季後再獲殊榮,他表示:「我諗今屆係更加開心,因為呢個獎係連繫聯賽冠軍。另外就係台上最佳11人入面,除咗和富大埔嘅球員,盧卡斯、費蘭度、梁諾恆都係曾經一齊並肩作戰,同我一齊經歷過嘅球員,所以喺台上面係好大感觸、好開心!同埋就係得到好多人明白,呢樣都係開心,我成日覺得3件事,首先你要選擇,跟住你要相信,相信係好關鍵,相信你嘅隊友、球會、自己,相信自己嘅方法、選擇係正確,然後到最後就係堅持。我開心自己可以堅持到,因為唔係得你自己一個人,身邊仲有好多人,陪你一齊嘅球員,雖然有離離合合,但係到最後成功做到呢件事(聯賽冠軍),我諗係對自己、家長、所有人都係一個交代。」
能夠擊敗傑志主教練朱志光和佳聯元朗主教練郭嘉諾,成為最佳教練,「堅Sir」期盼大眾能給予教練更多的支持:「我覺得今季嘅職業足球係做得好好,10隊球隊都有唔同風格,只不過大家嘅資源、配套唔同,但我認為係一個進步。我連續8年都係職業教練,相對其他教練,我嘅優勢係比較熟悉球員。有啲教練今季做番,其實係要時間,我希望大家體諒教練,因為教練真係需要時間去建立球隊。」他續說:「除咗豪門之外,其他中下游嘅球隊所面對嘅情況我都試過晒,係好辛苦。我覺得大家要明白,市場上球員有限,到你做主教練嘅時候,你係咪真係搵到球員呢?搵到嘅話咁你又有冇資源呢?其實做教練係好辛苦,所以我覺得每一個教練都好好。」
問及來季動向時,「堅Sir」坦言:「和富大埔肯定係有好多我想繼續嘅地方,有亞協、亞冠附加賽,亦都有好嘅人、事留喺度,但係我希望去再做多啲、超越多啲。嗰日贏完富力之後第二朝起身真係突然真係唔知點,做到以往十年、八年一路諗去做嘅一件事,個腦係諗唔到嘢,但係之後再去咗亞協,又會覺得喺亞協個舞台係另一個境界,接觸到唔同人、事。成日講『如何去做好香港足球』,大家都一窩蜂講做好青訓、點解做唔好青訓,但係我自己覺得係職業球會嘅重要性。一隊職業球隊出到外,去到亞洲其實你係展示到咩叫『香港足球』,係好直接嘅。」
「我好記得第一場去北韓對黎明,嗰度啲人因為唔識大埔所以不斷問,問你有幾多個香港隊球員等等。但係見完我哋練波之後,佢哋唔再問嘢,可能已經認定咗我哋唔掂,直至我哋同佢哋打和,佢哋走嚟恭喜我,我諗佢哋係覺得無理由贏唔到。當你得到香港以外其他球隊去尊重你,我覺得呢個已經係展示香港足球嘅地方。所以我會再諗,我哋第一次打亞協,當然已知出唔到線,但係我哋淨係輸過畀一隊波(4.25 SC),我覺得我哋盡咗力。我以為前人去咗好多次亞洲賽,可能會有好多資訊畀到我哋,但係都唔係得到太多。自己去睇過就會明白到,下季要點樣去準備,依家我就會清楚啲。我覺得呢個係大家一齊進步嘅地方,球圈成日講專業,我覺得專業就係要有好嘅計畫。雖然你未必做得到,但係你要知道點做,依家你問我需要幾錢、咩人,我會話到畀你聽,但你都可能已經知道你可以去到邊度,呢個就係需要嘅進步。和富大埔我肯定係好想有更大嘅支持,因為我唔覺得依家係停低嘅時候。」