【賽後解碼】8連勝！奧歷治係紅軍福將？

有運？實力？英超今晚重頭戲，由聯賽「一哥」利物浦主場迎戰第3位嘅李斯特城，「紅軍」上半場先有沙迪奧文尼單刀建功先拔頭籌，客隊去到完場前10分鐘由占士麥迪臣扳平1比1。眼見比賽要和波收場，點知去到補時階段，後備上陣嘅「紅軍」前鋒奧歷治一次禁區外準備起腳，猶疑之下被篤走腳下球，個波溜入禁區反而令李斯特城防線出現誤會，繼而畀後上嘅沙迪奧文尼攞番個波，之後文尼就畀「李城」守將馬克艾拜頓踢跌，博得12碼。極刑由利物浦隊長占士米拿操刀，一針見血，「紅軍」就此絕殺贏2比1，開季8連勝，將同次席曼城嘅差距拉開到8分，但多踢一場。值得一提，比利時射手奧歷治上季到今季，經常後備登場入波做贏波功臣，只係估唔到佢今場就算攞甩腳都幫到球隊，簡直係「紅軍」福將。

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。