菁英盃　地標戰和波　黃梓豪︰有改善空間

「菁英盃」周六（26日）假小西灣運動場上演B組分組賽賽事，佳聯元朗跟富力R&F以2比2打成平手完場，為「橙衫軍」把關的19歲門將黃梓豪雖然表示對自己職業生涯的「地標戰」感到興奮，但坦言自己仍需努力尋求進步︰「自己仲有好多改善空間，判斷可以唔好咁猶豫，輸第一球嘅時候自己都有猶豫到，面對住高波冇出到嚟，導致輸咗個頭槌畀人，其實我係可以出去，所以之後唔可以再驚，有球高波都出咗去。嚟得呢個場練咗咁多年冇得驚，喺呢場波都一直學習緊。」

曾經是傑志青年軍的「梓豪」，亦不忘感謝羅拔圖及鄭詠強兩位恩師的栽培，尤其是對他影響甚深的後者︰「嗰陣踢U16到依家都冇忘記，佢（鄭詠強）就好似一個師傅一樣，嗰陣放學去練波，練完波就跟佢練龍門練兩個鐘，然後再去試吓喺U18跟操，所以嗰陣進步得好快，知道自己點樣先可以做一個職業足球員，所以佢對我影響好大。雖然佢今日嚟唔到，但係佢都同我講咗啲說話，叫我定啲同唔好驚！」