东网电视
更多新闻短片
(Getty Images)
《英超刨绩王》加强版，最强数据一网打尽：http://win.on.cc/football/
周日(18日)凌晨英超压轴战，曼联作客以4比1反胜纽卡素，近期表现备受批评嘅红魔鬼中坚哈利马古尼大踢争气波，顶入关键1球，为球队扳平，奠定反胜基础。加上呢位英格兰国脚带伤上阵，更加赢得唔少同情分，一夜之间由罪人变英雄，够晒戏剧性。
上轮大败1比6嘅曼联，今场开波2分钟又出事，左闸劳基梳尔摆乌龙，迅速落后，以为又要面临另1场大败。估唔到竟然系之前经常出现甩漏嘅哈利马古尼以来拯救球队，23分钟佢接应桑马达开出嘅角球，劲顶入网，为曼联扳平。
曼联企稳阵脚之后，下半场展开大反击，拉舒福特博到12码，可惜波基斯费南迪斯主射，被门将卡尔达路夫扑出，亦系呢位葡萄牙国脚近20次主射12码，首次唔入。
不过，波基斯费南迪斯并冇受到影响，佢喺86分钟射入反超前1球，以及补时6分钟助攻拉舒福特入波，加上较早时间云比沙卡建功，曼联最终大胜4比1，为嚟紧周三(21日)凌晨欧联作客巴黎圣日耳门，打下一支强心针。
