專欄輪住嚟　未敢將一串心事講給小雨知

有捧復賽直播場嘅朋友，都應該喺有富力R&F踢嗰陣，聽過「大頭」講：「.....伊高沙托尼好似心事重重咁.....。」原來係有原因嘅。

聽講，就算富力R&F唔係劈庒，1011煞科嗰日對東方龍獅場波，都會係「伊高」為富力R&F踢嘅最後一場，事關原來佢將會跟隨梁諾恆同利安高步伐，轉戰中甲。咁到底佢心事重重，係因為有幾隊中甲對佢有興趣唔知點揀，定係根本唔到佢揀？咁就唔知喇！但係就算最後去唔成中甲，「伊高」都會被安排去廣州富力同陳俊樂做隊友。依家「伊高」已經上咗深圳，等隔離完再返廣州聽候富力嘅安排，最後去邊要等到11月上面轉會窗重開先會揭盅。

另外，新一季開之前，有幾隊都會有新兵加盟，大部分都係新面孔，好似愉園、香港飛馬、冠忠南區同標準流浪咁。但都有最少2個係舊面孔，其中一位係之前嚟踢嗰陣，非常受球迷歡迎，唔知大家有冇咩心水呢？

大頭