高普哥帅联手推动　英超或恢复换5人

《英超刨绩王》加强版，最强数据一网打尽：http://win.on.cc/football/　<br/><br/>英超上季复赛之后，曾经容许每队每场更换5个球员，减轻球员因赛程密集嘅负担，不过今季开始已回复换3人嘅旧制，但系随住不断有球员出现肌肉受伤，球员负荷太重嘅疑虑再次浮现，利物浦领队高普同曼城领队哥迪奥拿，就联手推动恢复每场换5人嘅措施。<br/><br/>哥迪奥拿表示：“咁做目的系要保护球员，数字已经说明一切，今季因肌肉劳损而出现嘅伤患比上季多出50%......点解全世界都仲系每场换5个人，但体能消耗最大嘅英超反而只可以换3个？”高普亦都话：“前列球队提出呢个建议唔系谂住搵着数，而系我哋睇到个赛程，知道会非常难挨。不过我谂要转返换5人系冇可能，因为根本唔够票数，呢个系制度问题。”<br/><br/>英超每次修例，都要20队当中最少14队赞成，据英国《每日邮报》报道，8月份首次就换人名额投票，希望维持换5人嘅系9票赞成对11票反对，9月份第2次投票就输得更多，消息指“Big6”系每场换5人嘅主要推动者，但其他球员认为咁做系有利阵容鼎盛嘅大球会，所以提出反对。<br/><br/>不过依家各队都开始出现伤兵问题，“Big6”计划再一次推动恢复换5人投票，而国际足协理事会(IFAB)已表明批准英超喺球季进行期间改例。