PSG被針對？靴里拉：球證叫我哋食屎呀

美職開鑼，即上《美職刨績王》：https://win.on.cc/football/league/mls/index.html　

巴黎聖日耳門(PSG)喺歐聯4強次回合輸波出局之後，中場安達靴里拉仍然忿忿不平，認為係輸喺球證古柏斯手上，更加指呢位48歲荷蘭籍判官非常冇品，出言不遜，叫PSG中場里安度柏利迪斯去食屎。

安達靴里拉話：「90分鐘比賽之中，我哋表現比對手好，進攻時為對方製造好多麻煩，我哋可以抬起頭離場，當然球隊都有地方需要改善，最令我哋不滿嘅係球證，我哋一直好尊重球證，但佢竟然對住里安度柏利迪斯講：『你去食屎啦』，如果換成我哋對住佢咁講，恐怕起碼會被判罰停賽3、4場。」

不過，球證古柏斯今場判決並冇針對PSG，甚至開波初段，更加誤吹曼城後衞辛真高犯手球，判罰12碼，但VAR介入之後，先至取消。至於迪馬利亞被逐，明顯係故意踢人，判決正確，至於球證古柏斯有冇叫里安度柏利迪斯去食屎，可能只有佢自己知。