拿高斯文亮相拜仁　月底齊人備戰

即上歐國盃專頁，每日重心提供盡在《彩報》：https://win.on.cc/　

德甲班霸拜仁慕尼黑新時代展開！拿高斯文周四(1日)正式喺慕尼黑亮相，並且帶同佢嘅團隊參觀訓練場，拜仁總監沙歷咸美斯大讚佢係「革命性」嘅教練，有信心佢可以帶領拜仁慕尼黑走向巔峰。

現年33歲嘅拿高斯文今夏由RB萊比錫轉教拜仁慕尼黑，7月1日正式上任後，沙歷咸美斯即大笠高帽：「我哋請到個非常年輕同創新嘅教練，唔少歐洲頂尖豪門都想佢加盟，好開心拿高斯文決定為拜仁譜寫新嘅歷史。」

拿高斯文會即刻展開季前備戰，「好消息」係拜仁陣中13位出戰歐國盃嘅球員，已經全部出局，意味所有球員喺月中至月尾就可以歸隊備戰。波蘭前鋒羅拔利雲度夫斯基雖然最早出局，但消息指拜仁決定畀佢更多休息時間，所以會喺月底先返拜仁報到。