逾千曼迷半場走人　連格被滋擾霸氣反擊

足球博彩神器，每日重心提供盡在《彩報》：http://win.on.cc/football/　

曼聯喺奧脫福球場被死敵利物浦打爆，球迷嘅憤怒同失望唔難理解，就喺完上半場前輸到0比4後，奧脫福球場外出現悲慘一幕，據報有近千名球迷同時離開球場「冇眼睇」！去到保羅普巴60分鐘食紅牌之後，球場上空鏡頭更影到場外出現「散場」人潮，唔忍心再睇到支持嘅球隊被羞辱！

繼續留喺球場內嘅粉絲亦怨氣沖天，據報喺半場左右時間，當連格喺場邊做緊熱身嗰陣，受到看台上球迷出言攻擊，而連格亦抵唔住頸回應：「我連落場都冇份！」連格今仗最終都冇份落場，佢賽後就喺twitter解釋：「個球迷並唔係羞辱我，佢叫我努力啲，講到我好似唔努力咁樣，所以我先咁回應佢，完。」呢句霸氣回應除咗回應球迷之外，似乎亦係畀緊說話蘇斯克查聽！