巴塞隆拿吞3蛋出局 18年來首度無緣淘汰賽

2021年12月09日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
歐聯分組賽E組煞科戰,巴塞隆拿作客慘吞拜仁慕尼黑3蛋,只能夠排小組第3名,將會降格踢歐霸盃附加賽。今次係巴塞自03/04球季後(出戰歐洲足協盃),首次冇出現喺歐聯淘汰賽。最特別嘅係,巴塞連續17年出戰歐聯淘汰賽嘅起點係04/05球季,即係美斯升上一隊兼歐聯首演嘅球季;今個夏天美斯離隊,巴塞嘅歐聯走勢即告斷纜,始於美斯、終於美斯。
要贏波先肯定出線嘅巴塞,今場面對已篤定出線嘅拜仁明顯力有不逮,34分鐘湯馬士梅拿接應羅拔利雲度夫斯基傳中笠入領先,完半場前再走甩利萊辛尼輸到0比2。陷入絕境嘅巴塞雖然仍未放棄,但62分鐘再被穆斯亞拿攻陷,繼首循環主場輸0比3後,今仗戰果重演再吞3蛋。
同組賓菲加喺主場2比0輕取基輔戴拿模,6戰得8分超越巴塞升上小組第2位,巴塞只得第3位要降格踢歐霸附加賽。巴塞對上一次喺歐聯分組賽出局,已經係00/01球季,當時佢哋輸畀AC米蘭同列斯聯而無緣出線。
延伸閱讀:【歐聯16強已出15隊 英超再成大贏家】
巴塞教練沙維賽後表:「我哋一直想控制比賽,但今場相反畀拜仁控制局面。巴塞應該有更高標準,呢場會係球會展開新時代嘅轉捩點,我哋要面對現實,我唔鍾意『失敗』呢個詞語,我愛巴塞隆拿,會付出生命去令球隊重上高峰。」