港超聯　窿對窿！東方龍獅和富大埔各執1分

「中銀人壽香港超級聯賽」周六（27日）首個比賽日壓軸上演焦點大戰，東方龍獅於旺角大球場，面對今季新升班的和富大埔。結果雙方90分鐘互無紀錄，大埔於重返港超首戰，以0比0賽和東方，成功搶分。

作為港超首個比賽壓軸戰，賽前大會舉行簡單的開鑼儀式，現場亦吸引2448名球迷入場觀戰。東方今場有高素巴耶夫及黃皓雋首次為球隊擔正，朱偉鈞負責攻堅，派牌工作交給馬希偉、馬高斯及隊長梁振邦，葉鴻輝把守最後大關；大埔於重返頂級聯賽首戰，派出兩位巴西新兵保連奴及加比爾，門將位置起用李瀚灝，鍾偉強、李家豪及鄭子森等齊齊出現在正選大軍中。

雙方開局都互相試探，嘗試尋找比賽節奏。8分鐘大埔率先發圍，鄭子森禁區頂推順起腳，被葉鴻輝接實。19分鐘，黃梓浩左路傳中，黃皓雋「窩利」抽射一飛沖天，其後朱偉鈞門前接應傳中起腳之際，又被回防的李嘉豪破壞。

雙方站穩陣腳後，都努力嘗試組織攻勢。21分鐘，馬高斯K角位放冷箭，被李瀚灝雙拳擋走。大埔其後先後有翁煦濤和鄭子森，找到起腳機會，但都未能威脅葉鴻輝。38分鐘，大埔前鋒保連奴受傷未能堅持比賽，要由趙少維入替。臨完半場前，大埔中堅加比爾後上助攻，接應角球頭槌頂斜，雙方半場互無紀錄。

換邊後，大埔率先換人，派出另一位倒戈的球員王力威。49分鐘，翁煦濤開出角球，鍾偉強無人看管下頂個彈地波，未能命中目標。54分鐘，加比爾接應角球攻門，被東方守將擋出，翁煦濤緊接禁區外的射門，亦緊緊高出。及後東方作出調動，由巴杜姆入替朱偉鈞。

比賽後段，東方一度將大埔壓制於半場，大埔則靠穩守突擊，創造出幾次攻勢，惟雙方都未組織出入肉埋門機會。最終東方龍獅以0比0賽和和富大埔，各得1分。

賽後東方主教練盧比度（Chino）表示對賽果並不感到驚訝：「今季每場波就係會好似今日咁，非常困難，要知道我哋已經唔係3、4年前嘅東方，我對最終結果唔感到失望。」他表示球隊在埋門一腳，表現有待改善。今場東方正選加後備僅有20名球員，Chino坦言以這個陣容去應付全季非常困難：「我都希望有30個球員畀我揀，但現實係我冇，我哋會用好現有人腳，我會支持呢班球員直到完季。」他透露球隊將重簽亞歷斯祖，以增加球隊人腳儲備，並表示球隊大軍明日將啟程前往烏茲別克，準備「亞協盃」跨區4強戰。

至於和富大埔主教練李恆匯則滿意球員發揮，覺得他們表現合乎預期，又認為如果球隊可以保持態度，就有機會取得進步：「我有啲擔心佢哋今日表現得好，唔代表下場都係咁。但我覺得只要佢哋保持呢個態度練習，或者執行戰術，我諗佢哋可以再好啲。」

「阿匯」今場首次以主教練身份領軍，就成功打和東方龍獅，他指擔任這個位置的壓力頗大：「以前幫堅sir（李志堅）同陳sir（陳曉明）做助教，我都了解到佢哋嘅壓力。但今次就算我叫做後生啲，嗰心都跳得好快。」