基沙文第100球　馬體會西甲3連勝

足球博彩神器，每日重心提供盡在《彩報》：http://win.on.cc/football/　

周日(16日)凌晨西甲賽事，馬德里體育會作客1比0險勝畢爾包，啱啱先由巴塞隆拿正式買斷嘅基沙文，攻入佢喺馬體會生涯第100個西甲入球，意義非凡。

之前因為巴塞外借條款問題，幾乎每場都只係踢30分鐘左右嘅基沙文，正式轉會後即刻復任正選，今場更喺47分鐘接應艾華路莫拉達傳送，攻入全場唯一入球。馬體會之後有門將奧比歷腦震盪傷出，尾段被圍攻下仍堅守城池，最終贏1比0拎到聯賽3連勝。

基沙文喺2014至2019年間，為馬體會喺西甲入94球，上季外借回巢後只入3球，今季季初雖然長居後備，今仗場入波已經係今季第3球，令佢成為馬體會史上第6位有100個聯賽入波球員。基沙文賽後表示：「之前唔能夠做正選係好失望，但無論正選定後備，我都會全力以赴，我依家好開心，因為聽日我可以同囝囝講，爸爸又入波啦！」