比列安保路「倒戈」入波 瑞士贏喀麥隆

2022年11月24日 19:56
東網電視
更多新聞短片
比列安保路(7號)入波拒絕慶祝。(Getty Images)
世盃狂熱盡在《彩報》:https://win.on.cc/football/ 
周四(24日)晚世界盃G組,瑞士以1比0擊敗喀麥隆,今場出現感人一幕,本身係喀麥隆裔嘅瑞士前鋒比列安保路,「倒戈」入波後拒絕慶祝,以示對祖國嘅尊重,果然有情有義。至於喀麥隆食白果之後,今屆首4支登場嘅非洲球隊都冇波入,認真失威。
其實喀麥隆上半場創造唔少具威脅攻勢,開波9分鐘就有托高伊甘比禁區內起腳射高。4分鐘後,呢支「非洲雄獅」獲得黃金機會,瑞士中堅文路爾艾簡治失誤,祖普莫亭單刀長驅直進,但喺對手力逼之下,射門軟而無力被瑞士門將恩尼森馬沒收,呢位前鋒今季為拜仁慕尼黑上陣16場入11球,但呢次射門處理得非常差。
其後喀麥隆右路發動攻勢,托高伊甘比準備近門起腳,被瑞士後衞施雲韋迪馬及時出腳解圍,至於瑞士上半場最有威脅攻門係文路爾艾簡治迎頂角球斜出。
換邊後唔夠3分鐘,瑞士突然發威,梳頓沙基利右路傳中,比列安保路無人看管之下射入,呢位25歲前鋒拒絕慶祝,因為佢本身係喀麥隆人,父母離婚後,童年時候跟隨媽媽移居法國,其後媽媽改嫁,同1位瑞士人再婚,全家去瑞士生活。
比列安保路2014年獲得瑞士公民資格,並選擇代表呢支歐洲球隊,但佢並冇忘本,今場「倒戈」入波後舉起雙手唔慶祝,以示對出生地喀麥隆嘅尊重。
瑞士之後仲有1次黃金機會,魯賓華加斯禁區內勁射,被門將奧拿拿神勇撲出,格列沙加遠射亦被奧拿拿接實,瑞士維持小勝1比0。