高級銀牌　鐘樂安處子戰獲勝：希望贏冠軍！

港超聯球隊東方周一（26日）「拆禮物日」，於「高級組銀牌賽」4強，以1比0擊敗標準流浪，晉級決賽。今場首次為東方上陣的鐘樂安（Leon），對助球隊晉級感高興，盼望球隊迎難而上，奪得冠軍。

Leon今場聯同高素巴耶夫鎮守中路，表現稱職，協助東方力保勝果，他謂今仗絕對不易應付：「流浪實力唔錯，佢哋到下半場似乎仲主導咗形勢，但球隊成功保持不失，呢個對全隊嚟講係好大鼓舞。」東方晉級後，會在決賽與傑志正面交鋒，Leon表示了解到「藍鳥」實力強大，但仍會以奪冠為目標：「傑志係1支好強嘅球隊，所以決賽絕對會好難踢，但既然入到決賽，就有權爭冠軍，希望我哋到時會有好表現。」

曾入選蘇格蘭U15及U16的Leon，提到香港遠比蘇格蘭熱，但認為天氣未對其做成極大影響：「喺蘇格蘭踢波可能會冇咁快攰，因為嗰度冇咁暖，但呢個係足球嘅一部份，球員係應該要適應喺唔同天氣踢球，同埋我試過喺類似環境踢波，所以氣溫冇對我構成好大影響。」