東網電視
更多新聞短片
(Getty Images)
最強博彩盤路過關神器《串績王》：http://win.on.cc/football/
曼聯喺英超連輸2場後，原本以為好穩陣嘅前4席位出現暗湧，同季初要球員喺輸波後「罰跑」反省唔同，據《The Athletic》報道，主帥坦哈格喺對韋斯咸後，決定放球員2日假「叉叉電」，希望球員可以喺密集賽程中休養生息，以最佳狀態迎接剩低4場聯賽大戰。
曼聯開季大敗賓福特後，坦哈格曾取消球員休假，親身陪球員「罰跑」近14公里，呢招被視為曼聯球員「醒覺」嘅轉捩點。雖然坦哈格鐵腕治軍有效，但亦要識得執生，曼聯近期賽程密集，英超2連敗後球員身心俱疲，所以坦哈格就決定放多球員1日假。
喺英聯盃同英足盃都殺到入決賽，曼聯今季已經踢咗57場波，世盃後平均每3.8日就要踢1場，加上球隊傷兵不斷，坦哈格亦絕少大幅輪換。距離下場係周六(13日)對狼隊，坦哈格表示：「自聖誕節之後，我哋第1次有1個星期去備戰，球員需要休息，搵番能量繼續前進。最大嘅疲勞係精神上，只要你意志夠強，就可以承受得到。」
