紐尼斯慣性「慢熱」　預告下季大爆發！

最強博彩盤路過關神器《串績王》：http://win.on.cc/football/　

利物浦今季成績下滑，季前以8,500萬鎊(約8.37億港元)加盟嘅達雲紐尼斯，演出不似預期，今季29場聯賽只入9球，不過呢位23歲射手近日表示，佢嘅風格一向「慢熱」，經過今季熟習新環境後，下季將會迎嚟大爆發！

達雲紐尼斯速度、走位都一流，但係把握力就令人失望，達雲紐尼斯表示：「我有好多地方要改善，例如射門技術。但係同樣嘅事情都發生喺蘇亞雷斯身上，喺佢嘅第2季開始就大爆發。」蘇亞雷斯喺利物浦頭1季半，喺英超分別只入4球同11球，但之後2季就狂入54球。

同樣「慢熱」嘅達雲紐尼斯，自爆喺賓菲加亦有類似發展：「我效力賓菲加都有呢個情況，第1季喺我個人嚟講非常糟糕，第2季我就爆發。喺利物浦我相信都係一樣，希望下季可以交出我最好嘅一面。」達雲紐尼斯20/21球季加盟賓菲加，29場聯賽只入6球，但上季就28場入26球成為葡超金靴。