東網電視
更多新聞短片
奧拿拿澄清未有受冒犯。
曼聯喺歐聯擊敗哥本哈根後，門將奧拿拿勇救12碼成贏波功臣，不過賽後就發生種族歧視風波，阿根廷新星加拿祖喺社交網貼上2個「大猩猩」emoji嚟形容奧拿拿，被質疑有種族歧視含意，雖然奧拿拿已開腔力撐加拿祖冇冒犯意圖，但英格蘭足總仍然展開調查，或會作出停賽處分。
加拿祖嘅「大猩猩」貼文出現後，引起種族歧視爭議，只係15分鐘就閃電刪除，據報英格蘭足總已同曼聯接觸，調查事件有冇涉及不當行為。奧拿拿隨後公開為加拿祖辯護：「所有人都冇資格決定我有冇受到冒犯，我完全明白加拿祖嘅意思：力量同強壯，呢件事應該到此為止。」
雖然「受害者」奧拿拿到開聲，但足總一意孤行早有前科，貝拿度施華喺2019年就曾貼出一個黑人卡通公仔，形容曼城隊友班捷文文迪小時候嘅相片，即使2人都講明係開玩笑，但貝拿度施華照被停賽1場。2020年曼聯前鋒卡雲尼曾喺多謝球迷嘅貼文，用上喺英文入面有歧視含意嘅「Negrito」字眼，不過呢個字喺烏拉圭文係用嚟表達愛意，最終卡雲尼照被罰停賽3場。
