東網電視
更多新聞短片
曼聯又要換帥？(Getty Images)
曼聯主場吞紐卡素3蛋英聯盃出局，連同之前聯賽曼市打吡輸0比3，奧脫福捲起巨大風暴，《曼徹斯特晚報》報道，兩場慘敗令球員對主帥坦哈格信任度跌至新低，而其被炒順序亦升上榜首，曼聯進入換帥循環機會愈嚟愈高。
該報記者Samuel Luckhurst報道，來自更衣室消息稱，曼聯慘敗後引發部分球員不滿，負面情緒正在蔓延，對於坦哈格執教，球員產生愈來愈多懷疑，隊友之間互相埋怨不斷增加，對球隊發展方向亦非常不滿。
其實早在9月，曼聯球員已開始對坦哈格嘅批評感到厭倦，亦對佢嘅戰術感到懷疑，有球員認為，坦哈格傾向保護嫡系球員，同時攻擊其他球員，做法令人反感。報道雖然冇開名，但最明顯例子就係查頓辛祖，該英格蘭翼鋒與坦哈格不和，被踢出一隊操練，球員拒絕道歉，仲打算同坦哈格「鬥長命」，認為坦哈格比佢更早離隊。
照咁睇，查頓辛祖勝出機會愈來愈高，根據英國博彩公司賠率顯示，坦哈格已升上下個被炒領隊頂頭大熱，賠率約為2.25倍，仲熱過錫菲聯領隊希京保頓，帥位危危乎。
