湯馬士柏迪做手術今年玩完　1月被賣走？

阿仙奴中場湯馬士柏迪近年頻頻受傷，上個月中操練受傷後一直未有上陣，據報呢位加納中場日前進行手術治療大腿傷患，今年都唔能夠上陣。據報阿仙奴對湯馬士柏迪已失去耐性，唔排除1月轉會市場將佢賣走。

湯馬士柏迪曾經係阿仙奴中場靈魂，不過今年先後簽入佐真奴同迪格蘭賴斯後，呢位30歲中場嘅重要性已大大減低，今季因傷患影響只踢過4場聯賽，佢今次做手術後，2023年都唔可以再上陣，加上明年1月又要出戰非國盃，能夠為阿仙奴候命嘅時間又再減少。

據報阿仙奴已準備1月將佢賣走，意甲勁旅祖雲達斯同沙特阿拉伯球會今夏都曾經提出收購，但被阿仙奴拒絕，唔排除1月份會捲土重來，預計阿仙奴將索價若3,000萬鎊(約2.86億港元)。