東網電視
更多新聞短片
馬恩奧前途無限。(Getty Images)
曼聯喺英超作客3比0大破愛華頓，阿歷真度加拿祖嘅倒掛入波出盡風頭，不過論成場嘅演出同貢獻，首次喺英超擔正嘅18歲中場馬恩奧更加突出。馬恩奧嘅攻守全能表現，獲網民大讚係「巔峰期保羅普巴」，連般奴費南迪斯都話佢先係今場真正「全場最佳球員」！
被坦哈格睇好嘅馬恩奧，喺季前熱身受傷後一直缺陣，今仗佢搶贏蘇夫恩岩拉伯特個正選，表現非常出色，錄得100%攔截成功、5次爭搶成功、3次重奪球權、1次解圍同1次封阻，41次傳球亦有83%成功率，包括2次長傳，3次扭波有2次成功過人，網民大讚係巔峰時期保羅普巴嘅表現。
加拿祖獲頒「全場最佳球員」獎座，不過隊長般奴費南迪斯賽後直指，馬恩奧先最值得拎MVP，佢被問到呢個獎嘅安排嗰陣回應：「加拿祖表現一般啦，我咁講因為佢知道我對佢有更高期望，我讚同佢拎獎只因為個入球。我認為馬恩奧先係MVP，佢用波舒服而且零犯錯，喺佢個年紀真係好高質素。」
