艾利臣受傷　利物浦焗用基利靴

利物浦上場逼和曼城，但有門將艾利臣比加受傷，暫時未知要休息幾耐，紅軍短期內將會被逼起用2號門將基利靴把關。

上場英超大戰，利物浦因為艾利臣比加犯錯被艾寧夏蘭特攻破大門，幸好阿歷山大阿諾特扳平1比1執番1分，不過艾利臣比加賽後似乎受傷，當日賽後步出球場時步伐不穩，傳媒估計佢拉傷大腿，需要數星期休息，詳細情況要進行掃瞄檢查才確定。利物浦領隊高普坦言：「希望艾利臣比加情況如何，我都冇答案，佢話有小小問題。」

至於利物浦青訓出身，效力紅軍6季都做後備嘅基利靴，將有出頭機會，呢位25歲愛爾蘭國腳對《迴聲報》表示：「我嘅目標係落場比賽，提升比賽狀態同爭取成績，咁樣對我發展好重要。」事實上基利靴已經係紅軍歐霸盃同英聯盃門將，嚟緊將會喺聯賽登場，利物浦防線要靠佢頂住。