東網電視
更多新聞短片
格羅素上任唔夠3個月就被炒。
法甲老牌勁旅里昂今季跌入谷底，上場聯賽吞里爾2蛋後，依家喺法甲排包尾，同安全區有5分距離。里昂周五(1日)宣布將教練格羅素炒魷，呢位意大利教頭9月上任後只係執教過8場，而且仲喺對馬賽一仗遇襲搞到周身傷，呢2個幾月法國之旅形同噩夢。
里昂今季成績差勁，9月中請格羅素取代被炒嘅白蘭斯，可惜球隊並冇起色，佢執教嘅8場聯賽只有1勝3和4負，里昂隨即宣布將格羅素炒魷，並安排青年軍教練沙治暫時出任看守教練。上月里昂作客馬賽前，隊長被球迷掟硬物襲擊，格羅素受傷頭破血流，令賽事取消。
里昂星期日(3日)凌晨作客朗斯，沙治喺賽前記招表示對自己要「頂上」感到驚訝：「成件事好奇怪，我都係朝早先知要做看守教練，呢個記者會係我第1個任務。我係為里昂服務，雖然我都好驚訝，但喺呢個情況下已經冇退路。」
