回歸救駕？奇雲迪布尼入世冠盃名單

連續4場聯賽失分嘅曼城，今個月中將飛沙特阿拉伯爭逐世冠盃，球隊周四(7日)公布23人出征名單，養傷多時嘅奇雲迪布尼榜上有名，令球迷相信呢位比利時中場核心復出在即，有望成為曼城扭轉頹勢嘅救星。

世冠盃下星期展開，不過歐聯盟主曼城將直入4強，佢哋會等踢完16號對水晶宮嘅聯賽後，即飛沙特同利昂或浦和紅鑽爭奪決賽資格。曼城公布嘅23人名單當中，喺英超開咧戰大腿受傷做手術嘅奇雲迪布尼有份入選，預示佢離復出之期不遠。

奇雲迪布尼手術後，原本預計年底前復出，不過佢本人就話希望1月回歸，當時領隊哥迪奧拿亦回應：「佢話1月就係1月，佢要一步一步咁康復，就算只係做後備，都係球隊難以代替嘅武器。」隨住曼城近期陷入低潮，奇雲迪布尼或會加快復出時間，幫球隊度過難關。