東網電視
更多新聞短片
加雲菲臘斯今季英超僅上陣89分鐘。(Getty Images)
曼城防守中場洛迪卡斯簡迪上仗停賽，一度令人以為領隊哥迪奧拿會派出加雲菲臘斯踢正選，點知呢位28歲英格蘭國腳仍然全場坐冷板，哥帥最新承認，隊內已經冇加雲菲臘斯嘅位置，意味將於下月冬季轉會市場重開後，出售或者外借走佢。
哥迪奧拿上仗用2位中堅史東斯、文路爾艾簡治出任防守中場，都唔用加雲菲臘斯，哥帥被傳媒問到呢位球星處境時，就話：「我要求加雲菲臘斯有良好個性、思考能力，佢的確做得到，但我未能安排佢上陣，需要向佢道歉，以球隊目前情況，我睇唔到菲臘斯嘅位置，已經講過好多次，唔知下月會發生咩事，如果佢留隊，我會覺得高興。」
雖然哥迪奧拿口中冇話要踢走加雲菲臘斯，但明顯已經冇打算再起用佢，菲臘斯今季英超僅上陣89分鐘，若然繼續留隊，等同浪費球員生涯。
盛傳意甲球隊祖雲達斯有意借用加雲菲臘斯，代替因為服食禁藥被罰停賽嘅保羅普巴，近年唔少球員由英超轉戰意甲，都有唔錯表現，加雲菲臘斯加盟祖記都係拯救事業嘅好方法。
