東網電視
更多新聞短片
伊當麥巴比(右)為PSG首演。
周四(21日)凌晨法甲出現歷史性一幕，基利安麥巴比嘅16歲細佬伊當麥巴比，喺主場對梅斯一仗為巴黎聖日耳門(PSG)處子上陣，兩兄弟首度喺法甲合作。20號慶祝25歲生日嘅基利安麥巴比今仗梅開二度，帶領PSG贏3比1，令呢場比賽更具意義。
今仗上半場互無紀錄，PSG喺49分鐘由域天拿打破僅局，基利安麥巴比60分鐘轟入世界波拉開到2比0，梅斯喺72分鐘回敬1球，但基利安麥巴比83分鐘再入波鎖定勝局。補時階段出現歷史性一幕，16歲嘅伊當麥巴比後備登場，兩兄弟亦相視而笑，雖然表演機會唔多，但兩人完場後亦一齊接受球迷歡呼。着38號嘅伊當麥巴比踢防守中場，並已入選法國U16國家隊。
PSG贏波後繼續喺聯賽榜領放，依家領先次席嘅尼斯5分，基利安麥巴比亦以18個入球喺射手榜遙遙領先，排第2位嘅拿卡錫迪(里昂)同艾哥阿當斯(蒙彼利埃)都只入7球。
