東網電視
更多新聞短片
富安健洋將出戰亞洲盃。(Getty Images)
阿仙奴喺英超2連敗，爭標之路大受打擊，依家更面臨後防荒問題，3位正選左閘球員各有問題，辛真高突然受傷，積及基奧柯頂上表現差勁，啱啱復出嘅富安健洋又準備去踢亞洲盃，領隊阿迪達都幾頭痛。
阿仙奴對富咸前，傳出辛真高小腿受傷消息，日內將會進行檢查，阿迪達表示：「辛真高覺得小腿有唔妥，實際咩事我都唔知，等檢查睇下佢要休息幾耐。」辛真高受傷下，波蘭國腳積及基奧柯頂上左閘，但球隊就係因佢解圍漏油而失波，進攻亦冇貢獻，結果半場就被換走。
入替嘅富安健洋養傷接近1個月後首次復出，但踢完今仗就要返日本國家隊踢亞洲盃，隨時又要缺席1個月時間。阿仙奴本來仲有荷蘭國腳祖利安添巴可踢左閘，但佢自開鑼戰膝部韌帶重創下，一直養傷。
