東網電視
更多新聞短片
沙維完場後同對手發生爭執。
今季表現備受批評嘅巴塞隆拿，周一(8日)凌晨西盃32強幾乎出事，作客丁組球隊巴爾巴斯特羅只能險勝3比2，教練沙維更因為經常向球證施壓引起對手不滿，賽後被巴爾巴斯特羅球員圍攻推撞，贏得相當肉酸。
巴塞隆拿今場半力出擊，上半場表現唔差，18分鐘由費文盧比斯先拔頭籌，51分鐘拉芬夏比洛尼改寫成2比0，但之後放軟手腳就出事。巴爾巴斯特羅60分鐘追番1粒，令賽事變得緊湊，沙維即換入羅拔利雲度夫斯基同根度簡穩定局面，88分鐘「羅拔仔」射入12碼拉開3比1，點知93分鐘巴塞又輸番個12碼，被巴爾巴斯特羅追成2比3，主隊最後幾分鐘全軍壓境，但巴塞堅守城池保住3比2勝果。
比賽尾段氣氛緊張，沙維更就補時長度不斷向球證施壓，引嚟主隊球員不滿，完場後沙維同數名球員發生口角，更有巴爾巴斯特羅球員出手推人。沙維賽後表示：「我哋為自己製造不必要嘅麻煩，但最重要係完成任務(晉級)。」對於同對手嘅爭執，沙維就話：「我哋有啲討論，冇咩特別，唔需要營造緊張局面。」
