古馬雷斯現身巴黎　被爆要求「盡早轉會」

紐卡素總裁伊利斯早前證實，球會因財政問題可能被逼賣主力，巴西中場般奴古馬雷斯被視為「開刀」熱門，法甲豪門巴黎聖日耳門(PSG)對佢更虎視眈眈。正當傳聞吹得火紅火綠，般奴古馬雷斯近日就同家人現身巴黎，西班牙媒體更指佢要求「盡早轉會」，令紐卡素球迷非常擔心。

據巴西同西班牙傳媒報道，26歲嘅般奴古馬雷斯成為PSG教練安歷基嘅收購頭號目標，《每日體育報》更指呢位巴西國腳希望「盡早轉會」。唔知有心定巧合，佢日前就選擇同家人去巴黎度假，暢遊艾菲爾鐵塔、迪士尼樂園等景點。不過，轉會權威Fabrizio Romano表示：「般奴古馬雷斯去巴黎係私人性質，同巴黎聖日耳門無關，紐卡素冇打算喺1月份賣走佢。」

不過，般奴古馬雷斯如果決心轉會，離隊亦只係時間問題，雖然佢上年先同紐卡素續約至2028年，兼且有1億鎊(約10億港元)買斷費，但紐卡素總裁伊利斯已講明球會要持續發展，高價賣走主力嚟套現投資無可避免，消息指巴塞隆拿亦有興趣簽般奴古馬雷斯，但財政上難同PSG競爭。