曼聯U21射手食「大四喜」　成一隊救星

曼聯U21喺周六(27日)深夜U21英超賽事，主場以4比2擊敗諾域治U21，紅魔鬼新星森美馬達包辦四個入球，表現光芒四射，英國傳媒指呢位19歲翼鋒有望獲提升上一隊，協助曼聯解決鋒力不足問題。

森美馬達今仗上半場26分鐘已經入3球，完成「帽子戲法」，下半場再建一功，食出「大四喜」。其實森美馬達早已經屬於曼聯U21「球星」，曾經聯同阿歷真度加拿祖、馬恩奧一齊協助小紅魔奪得2021/22年球季青年英足盃冠軍，如今加拿祖、馬恩奧已經成為曼聯一隊成員，森美馬達經此一役之後，亦備受睇好可以獲提升上一隊。

曼聯主帥坦哈格早前表示，因為公平財政條例限制，無法喺今個冬季轉會市場簽入前鋒，所以輿論認為提拔森美馬達上一隊，都係一個唔錯選擇。