東網電視
更多新聞短片
阿歷山大阿諾特近期有傷在身。(Getty Images)
利物浦右後衞阿歷山大阿諾特諸事不順，除咗受傷患問題困擾之外，仲遭到1名女狂迷跟蹤及性騷擾，並且已長達1年，佢近期忍無可忍，於是聘請保鏢，更換電話號碼，並喺住所安裝閉路電視等保安系統，以免人身安全受威脅。
有消息人士向英國《太陽報》爆料，指1位女狂迷不斷騷擾阿歷山大阿諾特，包括瘋狂發訊息「轟炸」呢位25歲英格蘭國腳，仲會郵寄猥褻信件及物品去佢屋企，導致家人亦受到滋擾。
呢位女狂迷亦會跟蹤阿歷山大阿諾特，喺佢住所及利物浦訓練基地外徘徊，甚至會去阿諾特喜歡嘅餐廳，令佢不勝其煩，於是聘請保鏢，防止呢位女狂迷埋身，同時喺家中安裝閉路電視，以策安全及收集證據，以便將來採取法律行動。
利物浦管理層表明全力支持阿歷山大阿諾特，應付女狂迷騷擾，並建議佢暫時唔好喺社交網上載日常相片，減低被跟蹤嘅機會。阿諾特曾於1月初受傷，一度缺陣3星期，復出冇耐後，早前英超對般尼，又再次受傷，已經缺陣近2場比賽，亦無法出戰周日(25日)晚英聯盃決賽對車路士。
