東網電視
更多新聞短片
甘美治夏天勢離開拜仁。(Getty Images)
德國國腳甘美治喺拜仁慕尼黑嘅日子進入倒數，據德甲著名記者Florian Plettenberg爆料，拜仁已肯定夏天賣走呢位29歲球星，而甘美治亦願意離隊，但只會考慮5間球會──曼城、利物浦、阿仙奴、皇家馬德里同巴塞隆拿！
甘美治同拜仁嘅合約去到2025年完結，但續約就遲遲冇着落，為免明年「人財兩失」，所以決定喺夏天放人。拜仁季前曾想將甘美治賣去紐卡素，不過最終未能成事，早前亦有傳甘美治同教練杜曹助手不和，種種迹象顯示雙方「分手」機會極高。
有麝自然香，甘美治揀轉會眼角甚高，Florian Plettenberg透露，甘美治只會考慮曼城、利物浦、阿仙奴、皇家馬德里同巴塞隆拿5間球會嘅聘約，而當中已有球會提出斟介，之前盛傳有意簽佢嘅曼聯、車路士同巴黎聖日耳門，都會被甘美治拒絕。
