東網電視
更多新聞短片
阿根廷被視為美洲盃冠軍大熱。(Getty Images)
阿根廷周二(21日)公布夏天美洲盃大軍名單，「球王」美斯等多位世盃冠軍功臣繼續領軍，不過效力羅馬嘅前鋒保羅戴巴拿就意外落選。阿根廷係上屆(2021年)美洲盃冠軍，今屆亦被視為頂頭大熱，連埋2022年世界盃冠軍，阿根廷有機會實現國際大賽3連霸。
阿根廷領隊史卡朗尼今次公布29人初選大軍，6月12日提交正式名單前會再踢走3人，美斯、迪馬利亞、拿達路馬天尼斯、安素費南迪斯、利辛度馬天尼斯等世盃冠軍功臣悉數上榜，同時亦召入白禮頓守將華倫天巴高、蒙沙中場卡邦尼同曼聯翼鋒阿歷真度加拿祖3名19歲新星。
比較令人意外嘅係保羅戴巴拿未能入圍，呢位羅馬前鋒早前因肌肉傷患缺陣，但上場聯賽已經復出，佢今季意甲交出13個入波同9次助攻，表現出色。有傳今屆美洲盃，可能係36歲嘅美斯最後一次踢國際賽，佢「老友」迪馬利亞早前已表明美洲盃後退出國家隊。
