曼聯想買狼隊前鋒　頂替馬迪爾

曼聯前鋒安東尼馬迪爾今夏約滿離隊之後，紅魔鬼現時只剩下海倫、拉舒福特2位正前鋒，根據英國《鏡報》爆料，曼聯計劃簽入射手，目標人物包括狼隊前鋒馬菲奧斯根夏。

現年25歲嘅馬菲奧斯根夏上年1月由馬體會轉投狼隊，今季各項賽事上陣36場入14球及8次助攻，成功協助狼隊護級。呢位巴西國腳踢法充滿侵略性，加上年輕當打，符合曼聯新股東拉特克利夫只簽25歲或以下球員嘅要求。

馬菲奧斯根夏現時周薪僅6萬鎊(約60萬港元)，曼聯願意以高一倍人工吸引佢加盟，不過狼隊要求用6,000萬鎊(約6億港元)轉會費，成為交易一大障礙。

除咗馬菲奧斯根夏之外，曼聯亦留意緊韋斯咸翼鋒古達斯，呢位23歲加納國腳效力阿積士期間，曾經同紅魔鬼主帥坦哈格合作過。