尼馬搞亂檔　寸「小雲」醜樣惹爭議

巴西球星尼馬因為受傷，冇份參加今屆美洲國家盃，但都有前往主辦國美國睇波，入場為「森巴兵團」打氣。不過，呢位32歲老大哥衰多口，接受傳媒訪問時，嘲笑巴西現時當紅小生雲尼斯奧斯祖利亞醜樣，可能令呢位近期狀態欠佳嘅皇馬翼鋒心情進一步受打擊。

尼馬喺訪問中講及多個話題，最精彩一幕係記者問佢：「邊位係你球員生涯之中合作過最醜樣球員？」尼馬諗都唔諗就答：「一定係雲尼斯奧斯祖利亞，不過佢份人比較有興，總算可以彌補醜樣缺點。」雖然尼馬口吻似講笑，但普遍輿論認為雲尼斯奧斯祖利亞以小器、記仇見稱，以往比賽遭對手侵犯後，經常會作出報復，佢可能已經將尼馬呢番說話記喺心中，影響兩人將來合作關係。

雲尼斯奧斯祖利亞協助皇馬捧西甲及歐聯冠軍，但返回國家隊後，表現欠佳，上場美洲盃對哥斯達黎加，全場0射門，6次嘗試扭過對手都失敗，踢咗71分鐘就被換走。加上今次被尼馬嘲笑醜樣，球場內外受夾擊，隨時影響佢下場對巴拉圭嘅發揮。