利物浦門將執位　盧連有望接替艾利臣

利物浦今個夏天有施洛上任，球隊將要重新洗牌，其中門將位置可能有大變動，艾利臣比加、基利靴都傳出可能離隊，3號門將阿祖安約滿後亦已轉投貝迪斯，據報「紅軍」打算簽入2名新龍門，皇家馬德里嘅盧連就成為目標。

艾利臣比加一直被沙特豪門艾納斯挖角，利物浦可唔可以留人係未知數，而副選基利靴早就表明希望離隊尋求正選，轉會機會極大。西班牙《每日體育報》爆料，烏克蘭門將盧連已成利物浦收購目標，而阿仙奴亦對佢虎視眈眈。

25歲嘅盧連上季趁泰拔高圖爾斯重傷，成功上位，喺西甲同歐聯都有傑出表現，不過泰拔高圖爾斯季尾復出即刻重奪正選，如果盧連繼續留低，下季好可能會長坐冷板，利物浦就希望佢可以成為艾利臣比加接班人，有望打動呢位烏克蘭門將。