东网电视
更多新闻短片
约罗首演表现淡定。(Getty Images)
曼联季前备战进展非常顺利，转会窗快手连签2大目标后，周日(21日)凌晨作客苏格兰，再以2比0轻取格拉斯哥流浪。曼联今场有查顿辛祖相隔11个月后再度披甲，不过焦点就落喺新加盟嘅中坚约罗身上，呢位18岁中坚极速“地标”，用波出色兼曾勇救单刀，表现获领队坦哈格激赞。
仍有唔少主力未归队嘅曼联，今场有开波48小时前加盟嘅约罗担正，卡斯米路、美臣蒙特、庄尼伊云斯同“解冻”嘅查顿辛祖都正选上阵，上半场曼联表现占优，39分钟凭阿密特迪亚路个人表现，右路扣入中间禁区内抽入。下半场曼联换入大量年轻球员，70分钟再由小将晓基尔射成2比0完场。
着15号波衫嘅约罗成为焦点，佢显示出曼联点解愿意用5,200万镑重金收购，呢位中坚踢半场已有48次传送(92%成功率)，拦截同争波成功率都系100%，喺10分钟嗰阵格流前锋迪沙斯曾突破防线，约罗及时追上喺对上起脚前准确将个波铲走，瓦解呢场半单刀攻势。
约罗精彩瓦解对手单刀。
曼联领队坦哈格赛后大赞约罗：“‘兴奋’呢个字形容得好贴切，好开心可以签到佢。约罗有巨大嘅才华，好期待同佢合作，喺训练嗰阵佢已经表现得好轻松，佢令我哋好兴奋。”约罗赛后亦表示：“地标战太好啦，全队表现都好好，我满意自己演出，好多谢球迷嘅支持。”
