車路士緊急回收　法國奧運隊臨開波被逼換人

巴黎奧運男足賽事星期三(24日)展開，東道主法國開波前被逼轉陣，被列入候補名單嘅烏高卓古，周六(20)突然被車路士回收，法國足總發聲明證實呢位中場將唔會出戰巴黎奧運，並向奧委會申請召入另一球員代替。

20歲嘅烏高卓古獲亨利召入法國奧運大軍，雖然佢冇進入18人名單，但就係4個候補球員之一，奧運條例係候補球員可以隨時代替受傷球員上陣，不過車路士今次臨開波先突然收番烏高卓古，就令以金牌為目標嘅法國措手不及。

車路士早前已拒絕阿素迪沙斯同班洛特巴迪亞舒尼入選法國奧運隊，今次回收烏高卓古，據報車路士係想盡快幫佢物色新球會，希望外借去其他英超球隊磨練。法國男奧足今屆陣容鼎盛，拿卡錫迪、米高奧利斯、桑馬迪達等球星領銜爭金。