勝在識執生　比莉絲重奪個人全能金牌

巴黎奧運周五凌晨(2日)上演體操女子個人全能決賽，美國體操女王「黑珍珠」比莉絲展示王者風範，以超過1分優勢擊敗巴西選手，相隔8年重奪此項金牌，27歲嘅佢亦係自1952年赫爾辛基奧運後最高齡女子個人全能冠軍。

比莉絲在跳馬強勢起步，獲得15.766全場最高分，奠定基礎，雖然佢喺第2高低槓出現失誤，高槓轉低槓時幾乎落地，但比莉絲勝在識執生，及時修正冇掂地，得分13.733跌落第3。

第3項平衡木又係比莉絲強項，高難度得嚟又穩陣，攞到14.566分，已經重返榜首，嚟到第4項自由體操，比莉絲壓軸出場攞到全場最高嘅15.066分，以總分59.131奪得金牌，巴西選手ANDRADE Rebeca落後1.199分得銀牌，銅牌係美國嘅Sunisa Lee。

比莉絲奪金後，個人喺奧運累積6金1銀2銅共9面獎牌，嚟緊仲有單項，到時又可以繼續「吸金」。